Медведев Ресейде «Қазақстандағыдай» болмайтынына сенімді

РФ Қауіпсіздік кеңесі төрағасының орынбасары Дмитрий Медведев Қазақстанда биылғы қаңтардың басындағы оқиғалардың Ресейде қайталанбайтындығын, оған Ресейде ешқандай алғышарт жоқ екенін айтты.

«Мен бізде олай болады деп ойламаймын, себебі оған еш себеп жоқ. Біріншіден, азаматтарымыздың басым бөлігі ел президенті, үкімет ұстанатын бағытты қолдайды» деп РИА Новости Медведевтің сөзін келтірді.

Медведевтің айтуынша, «Ресейде террористік әрекеттің кез келген көріністеріне, қылмыстық қол сұғушылыққа жауап беруге қабілетті тиімді мемлекет» бар.

Дегенмен, Медведев баспасөзге берген сұхбатында Қазақстандағы оқиғалардың үлкен сабақ болғанын және оны ескермеуге болмайтынын атап өтті.

«Әрине, бұл фактор тек қазақстандық ішкі мәнге ғана ие деуге болмайды. Бұл аймақтық қауіпсіздік мәселесі. Оны елемеуге болмайды. Өйткені әңгіме Еуразиялық одақтың серіктесі, одақтасы, мүшесі, Еуразиялық экономикалық одақтың мүшесі, ҰҚШҰ, бізге жақын халық туралы болып отыр» деді Медведев.

Оның айтуынша, болған оқиға «жалпы аймақтық қауіпсіздіктің көрінісі».