Медициналық мекемеде өрт шықты: қаза тапқандар бар

Кеше, 11 ақпан күні түнде Бішкектегі кардиохирургия ғылыми-зерттеу институты өртке оранды, деп хабарлайды Orda.kz. 

Жергілікті басылымдардың мәліметінше,  өрт сөндіру қызметіне өрт туралы хабарлама сағат 21:00 шамасында келіп түскен. Тұрғындардың айтуынша, әуелі ғимараттың төртінші қабатында түтін байқалған екен. Ол жердегі пациенттер эвакуацияланды және басқа медициналық мекемелерге жіберілді. 

Мәліметтерге сүйенсек, орталықтың стационары 320 төсекке есептелген. Алайда өрт кезінде медициналық мекемедегі науқастардың нақты саны белгісіз болған. Кейін ТЖМ өрт кезінде екі адамның қаза тапқанын хабарлады. Ал өрт сөндірушілер жанып жатқан ғимараттан 260 адамды құтқарғанын айтты.

Өрт түн ортасына қарай толығымен сөндірілгені анықталды. Өрттің себептерін анықтау үшін министрлер кабинетінің басшысы Әділбек Қасымалиев ведомствоаралық комиссия құруды тапсырды. Сонымен қатар ол орталықтың қызметін тезірек қалпына келтіру және пациенттер мен медициналық персоналдың қауіпсіздігін қамтамасыз ету үшін барлық қажетті шараларды қабылдауды тапсырды.