«Медеу» саябағы мен Алматы қаласы экология департаменті басшылары күдікке ілінді

Алматы қаласы экология департаменті басшысының орынбасары мен «Медеу» саябағының басшылығы сыбайлас жемқорлыққа қатысы бар деген күдікке ілінді.

Алматы қаласы Экология және қоршаған ортаны қорғау департаменті басшысының орынбасары мен «Медеу» мемлекеттік өңірлік табиғи паркінің басшылығы сыбайлас жемқорлыққа қатысы бар деген күдікке ілінді, деп хабарлайды сыбайлас жемқорлыққа қарсы қызмет.

«Алматы тұрғындарын орынды алаңдатып отырған мәселелердің бірі – экология. Сыбайлас жемқорлыққа қарсы қызметтің Алматы қаласы бойынша департаменті осы саладағы шенеуніктердің жемқорлық әрекеттерінің жолын кесті. Осылайша, Алматы қаласы Экология және қоршаған ортаны қорғау департаменті басшысының орынбасары жүйелі түрде пара алғаны үшін ұсталды»  делінген жұма күні таратқан хабарламада.

Антикордың хабарлауынша, бизнес өкілдері шенеунікке «экологиялық постардағы көліктердің экологиялық мониторингін жүргізу үшін бұрын жасалған мемлекеттік сатып алулар туралы келісім-шарттар бойынша орындалған жұмыс актілеріне қол қойғаны үшін 12 миллион теңгеден астам қаражат берген».

«Сонымен қатар, әкімдікке қарасты мекеме «Медеу» мемлекеттік өңірлік табиғи паркі басшылығы сыбайлас жемқорлыққа жол бергені үшін ұсталды. Жедел-іздестіру шаралары  табиғи саябақ басшысы ағаштарды санитарлық кесу келісім-шарттары бойынша орындалған жұмыс актілеріне қол қойғаны үшін кәсіпкерден 1,5 миллион теңге көлемінде пара алғанын айғақпен анықтады»  делінген хабарламада.