Мәжіліс депутаты мектептерге салынатын әділетсіз айыппұлдар туралы айтты

Мәжіліс депутаты Асхат Аймағамбетов өзінің әлеуметтік желісінде мектептер мен ауруханаларға салынатын әділетсіз айыппұлдар туралы пікір білдірді, деп хабарлайды Orda.kz порталы.

«Мектеп, аурухана, балабақша, колледж сияқты бюджеттік мекемелердің директорларына жүз мыңдаған айыппұл салу проблемасы ушығып барады. Кейін сол 500-600 мың айыппұлды директор қалай және кімнен жинайтыны айтпаса да түсінікті» деп жазды ол әлеуметтік желіде. 

Оның сөзінше,  директорларды мектептің үш ауысымды болғаны немесе құрал-жабдықтары мен зертханалары жеткілікті деңгейде болмағаны үшін айыппұл төлеуге мәжбүрлеу – әділетсіз.

«Егер мектеп үш ауысымды болса, бұл директордың кінәсы емес, әкімшіліктің кемшілігі. Бұған қоса, мемлекет тарапынан мектептердің жеткіліксіз қаржыландырылуы да осы мәселелерге әкеледі» деп жазды Аймағамбетов.

Ол мәселенің шешілуіне әсер етпейтін айыппұлдарды салуды доғару керек екенін айтты.