Мәжіліс депутаты Еділ Жаңбыршин өзінің гетеросексуал екенін айтты

Депутат ЛГБТ өкілдерін «жарнамалау немесе насихаттау» әрекеттеріне қатысты заңдағы түзетулерді түсіндірді, деп хабарлайды Orda.kz.

Депутаттың сөзінше, өзінің жыныстық бағдарын ашық айтып, оған адам тартып, семинарлар өткізу, акцияларға қатысу немесе әлеуметтік желі мен БАҚ-та символика көрсету сияқты әрекетке барғандар әкімшілік жауапкершілікке тартылады.

«Қазақстанда ЛГБТ болуға заң бойынша тыйым салынбайды. Сондықтан ешкім сотталып, айыппұл төлей қоймайды. Бұл әр адамның жеке таңдауы. Бірақ егер адам ашық түрде өз қауымдастығын жарнамалап, басқаларды оған шақырса, насихат жасаса, бұл заңға қарсы әрекет болып саналады», — деді Жанбыршин.

Сонымен қатар депутат бір жынысты некелер көбейсе, туу көрсеткіші төмендейтінін және ЛГБТ өкілдері арасында өз-өзіне қол жұмсау оқиғалары жиі болатынын айтты.

«Мысалы, Канадада 14–24 жас аралығындағы жастардың шамамен 25%-ы өмірінде кем дегенде бір рет суицид жайына тап болған. АҚШ-та бір жынысты бағдардағы адамдардың 40%-ы осындай қиындықты бастан өткерген. Бұл көрсеткіш дәстүрлі гетеросексуалды отбасылардағы жастарға қарағанда бірнеше есе жоғары. Сонымен қатар, мұндай қатынастарды заңдастырған елдер демографиялық және экономикалық тұрғыдан да қиындықтарға тап болып отыр. Ол жақта туу көрсеткіші өте төмен. Қазақстанда да халық аз, аумағы үлкен ел болғандықтан, бұл мәселе бізге де әсер етуі мүмкін», — деді депутат.

Соңында депутат өз бағдарын ашып айтты:

«Үйде не істейтініңізге ешкімнің шаруасы жоқ. Бірақ насихат жасамаңыз. Мен өзімнің гетеросексуал екенімді жарнамаламаймын, акцияларға шықпаймын. Жеке қатынасты үйде құрыңыз, қоғамда көрсетпеңіз».

Заңға түзету енгізілмес бұрын құқық қорғаушылар бірнеше рет сын айтқан. Олардың ойынша, бұл норма ЛГБТ өкілдерінің құқықтарын шектеп, қоғамда ксенофобия мен жек көруді туғызуы мүмкін.

«Мүмкін, бұл тек авторитарлық режимдерде есепке тартылудан қорқатын адамдарды қорғау үшін жасалған шығар. Бірақ шын мәнінде халықтың назарын басқа жаққа аудару, “ішкі жауды” қолдан жасап, айыптау арқылы шынайы проблемаларды ұмыттыру әрекетіне ұқсайды», — деген болатын.

Еске сала кетейік, Ұжымдық қауіпсіздік шарты ұйымында Иманғали Тасмағамбетовтің өкілеттік мерзімі аяқталуға таяды. Ал мүше мемлекеттер келесі үш жылға оның орнына жаңа бас хатшыны таңдайды. Жаңа бас хатшы кандидатурасы 27 желтоқсан күні Бішкекте қаралады.