Мәжіліс БАҚ туралы заң жобасын қабылдады

Мәжіліс «Бұқаралық ақпарат құралдары туралы» заң жобасын қабылдады, деп хабарлайды Orda.kz порталы.

Заң жобасы, сондай-ақ ілеспе түзетулер екінші оқылымда қабылданды. Ол күшіне енгеннен кейін бұрынғы  «Бұқаралық ақпарат құралдары туралы» және «Телерадио хабарларын тарату туралы» заңдардың күші жойылады.

БАҚ қызметкерлерінің құқықтарын қорғау аясында құқықтардың бұзылуына байланысты БАҚ материалдарына «ескіру мерзімі» енгізілді. Бұрын мұндай ақпарат БАҚ-та жарияланған күннен бастап 3 жыл деп белгілеу ұсынылған болатын. Талқылау нәтижесінде «ескіру мерзімі» бір жылға дейін қысқартылды.

Сонымен қатар, заң журналистердің кәсіби қызметіне құқықтық кепілдіктерді белгілеп, БАҚ-тың негізгі міндеттерін нақтылады.

Пресс-карта енгізу туралы ұсыныс бұған дейін дау тудырып, заңнан алынып тасталған болатын. Сондай-ақ «бұқаралық ақпарат», «діни телебағдарлама», «телеарнаны тіркеу туралы куәлік» ұғымдары алынып тасталып, «журналистің ерекше мәртебесі», «аккредитацияның оңайлатылған тәртібі» сияқты жаңа ұғымдар енгізілді. Бұқаралық ақпарат құралдарына мониторинг жүргізу құзыреті уәкілетті органға жүктеледі.