Маңғыстауда 76 млн теңге жымқырған мектептің есепшісі ұсталды

Маңғыстау облысында прокурорлар облыс орталығының жалпы білім беретін мектептерінің бірінде 76 млн теңгеден астам бюджет қаражатының жымқырылғанын анықтады. Штаттық кесте мен банктік шоттарды салыстыру барысында 3 жыл бойы өзіне артық қаржы есептеген мектептің бас есепшісінің тиісті және іс-жүзінде төленген жалақысы арасындағы айырмашылық белгілі болған.

Аталған факті бойынша прокурорлармен қылмыстық іс қозғалып, тергеу ЭТД-не тапсырылды. Тергеу барысында аталған мектептің есепшісі кінәсін толықтай мойындады.

«Сот үкімімен кінәлі адам Қазақстан Республикасы Қылмыстық кодексінің 189-бабының 4-бөлігі (сеніп тапсырылған мүлікті иемдену және ысырап ету) бойынша 5 жыл мерзімге материалдық-жауапты лауазымдарды атқару құқығынан айыра отырып, 7 жылға бас бостандығынан айырылды. Сот үкімі заңды күшіне енген жоқ» деп жазылған хабарламада.