Матч алдында «Атырау» мен «Ақтөбе» жанкүйерлері жаппай төбелес шығарды

19 маусым күні кешке Атырауда екі футбол клубының жанкүйерлері арасында жаппай төбелес орын алды.

Оқиға орнынан түсірілген видеода граната жарылысына ұқсас дыбыстар естіледі. Оны естіген cоң ойынды тамашалауға келгендер тарап кеткен.

ҚазТАГ хабарлауынша, жанжал сағат 17:55-тер шамасында Атырау мен Ақтөбе командалары арасындағы матч басталар алдында болған.

Полиция қызметкерлері төбелеске қатысқан 30-ға жуық адамды Атырау қалалық ІІБ-не әкетті.

«Тиісті құжаттар жинақталып жатыр» деп хабарлады Атырау облыстық полиция департаментінің баспасөз қызметі.

Полицейлер әлеуметтік желілерде қару қолданылғаны туралы жалған ақпарат тарағанын айтады.

«Жанкүйерлердің қолында түрлі-түсті түтін болған. Ешкім зардап шеккен жоқ» деді полиция.