Мәсімов шынында жазасын өтеп жатыр ма?

Ішкі істер министрлігі ұлттық қауіпсіздік комитетінің бұрынғы басшысы шынымен де жазасын өтеп жатыр деп сендірді.

Мәжіліс кулуарында журналистер ішкі істер министрлігінің басшысына «Кәрім Мәсімов шынымен жазасын өтеп жатыр ма?» деген сұрақ қойды. 

«Біз қазір тұтқынды көрсете алмаймыз. Ол сотталған, бас бостандығынан айыру орнында отыр»,  деді Ержан Сәденов.

2023 жылғы 24 сәуірде Астананың қылмыстық істер жөніндегі мамандандырылған ауданаралық соты ұлттық қауіпсіздік комитетінің бұрынғы төрағасы Кәрім Мәсімов пен оның орынбасарлары А.Садықұлов, Д.Ерғожин, М.Осиповқа қатысты қылмыстық іс бойынша үкім шығарды. К.Мәсімов пен А.Садықұлов мемлекетке опасыздық жасау, билікті күшпен басып алу, билігін және лауазымдық өкілеттерін асыра пайдалану, Д.Ерғожин билікті күштеп басып алу, билікті және лауазымдық өкілеттерін асыра пайдалану, М.Осипов өкілеттерін асыра пайдалану бойынша кінәлі деп танылды. Кәрім Мәсімов 18 жылға сотталды.