Масаншыда төрт адамды өлтірген азамат ұсталды - ІІМ

2020 жылы Масаншы ауылында төрт адамды өлтірген ер адам Алматы облысында ұсталды, деп хабарлады ҚР ІІМ Әкімшілік полиция комитеті департаменті бастығының орынбасары Дәурен Қозыбақов.

«Алматы облысында 2020 жылдың 7 ақпанында Қордай ауданы Масаншы ауылында бір топ адам болып, төрт адамды аңшы мылтығынан атып өлтірген халықаралық іздеуде жүрген қылмыскер ұсталды. Аңшы мылтығы тәркіленді» деді Қозыбақов брифингте.

Еске салсақ, 2020 жылдың 7-8 ақпанында Қордай ауданында жаппай тәртіпсіздіктер орын алып, 11 адам қаза тауып, 100-ден астамы жараланған болатын. 200-ге жуық үй мен кәсіпорын қирап, 100-ге жуық көлік өртеніп кетті. Қақтығысқа 1000-ға жуық адам қатысты. 120 қылмыстық іс қозғалды, оның ішінде Қылмыстық кодекстің 99-бабы (кісі өлтіру) бойынша 11 іс бар.

2021 жылдың сәуір айында Тараз соты Масаншы, Бұлар батыр және Ауқатты ауылдарындағы жаппай тәртіпсіздіктер бойынша 50 адамды түрлі қылмыстық баптар бойынша айыпты деп танып, 1 адам кінәсі дәлелденбегендіктен ақталды. Сот процесі 2020 жылдың желтоқсан айынан бері жүріп жатыр. Іс 400 томнан тұрды. Іс бойынша 366 адам жәбірленуші деп танылды. Айыпталушыны 60-тан астам адвокат қорғады.