Мас күйінде ұсталған Форт-Шевченко әкімі қамауға алынды

Маңғыстау облысында бейбіт митинг кезінде мас күйінде ұсталған Форт-Шевченко қаласының әкімі Шалқыбай Әзірбаев Түпқараған аудандық сотының алдына шықты.

Шенеунікке қатысты әкімшілік құқық бұзушылық туралы кодексінің 608-бабының 1-бөлігі бойынша әкімшілік іс қозғалды.

«Сотпен Ш.Әзірбаев «Ақтау-Форт-Шевченконың» 3 шақырымында Toyota Camry 2,4 маркалы мемлекеттік нөмірі 397 АС 12 автомашинасын мас күйінде басқарғаны анықталды. Медициналық куәландыру қорытындысы 0,73 пайызды – жеңіл дәрежедегі алкогольдік масаңдықты құрайды» деп хабарлады Түпқараған аудандық сотының баспасөз қызметі.

Соттың баспасөз қызметі ҚР ӘҚБтК-нің 608-бабы 1-бөлігінің әкімшілік құқық бұзушылық туралы кодексінде – жүргізушінің алкогольден, есірткіден және (немесе) уытқұмарлықтан мас күйде көлік құралын басқаруы, сол сияқты көлік құралын жүргізуді алкогольден, есірткіден және (немесе) уытқұмарлықтан масаң күйдегі адамға беруі он бес тәулікке әкімшілік қамауға және жеті жыл мерзімге көлік құралын басқару құқығынан айыруға әкеп соғатынын түсіндірді.

«Сот отырысында Ш.Әзірбаев кінәсін мойындамай, алкогольдік ішімдік ішпегенін, тек ауруына байланысты мойынын спиртпен жаққанымен түсіндірді. Қорытындылай келе, прокурор Әзірбаев Шалқыбайды кінәлі деп танып, он бес тәулікке әкімшілік қамаққа алу және жеті жыл мерзімге көлік құралын жүргізу құқығынан айыру жазасын тағайындауды сұрады.

Сот қаулысымен Әзірбаев Шалқыбай ӘҚБтК-нің 608-бабының 1-бөлігі бойынша әкімшілік жауапкершілікке тартылып, он бес тәулікке әкімшілік қамау және жеті жыл мерзімге көлік құралын басқару құқығынан айыру түріндегі әкімшілік жазаға тартылды» деп хабарлады соттың баспасөз қызметі.

Қаулы заңды күшіне енген жоқ.