Мас күйінде көлік жүргізген депутат мандатынан айрылып, қамауға алынды

Ақтөбе мәслихатының депутаты мас күйінде көлік жүргізгені белгілі болды. Халық қалаулысы өз кінәсін мойындамайды, бірақ сот оны жүргізуші куәлігінен айыру және 15 тәулікке қамауға алу туралы шешім шығарды.

Диапазон мәліметінше, 20 мамырда Ақтөбе қалалық мәслихатының депутаты Ерболат Қасымғалиды полицейлер тоқтатқан. Медициналық куәландыруға жіберілген депутаттың қанында алкоголь бар екені көрсетілген.

Қасымғали куәландыру нәтижелерімен келіспеді және мас күйінде көлік жүргізді деген айыптан бас тартты. Іс сотқа өтті. Депутат 15 күнге қамалып, 7 жылға жүргізуші куәлігінен, сонымен қатар, депутаттық мандатынан айырылды.

– Ербол Қасымғали депутаттық өкілеттігін тоқтатты, - деп хабарлады аумақтық сайлау комиссиясы.

Ақтөбе қалалық мәслихаты сайтында Ерболат Қасымғалидың «Ойл Гео Контракт» ЖШС Бас директоры қызметін атқаратыны көрсетілген.