Марқұмды жазылды деп шығарған хирургтың үстінен арыз түсті

Алматы қаласы Алмалы ауданы прокуратурасына Алматы қалалық кардиологиялық орталығының бұрынғы басшысы Қодасбаевтың үстінен ауруханада көз жұмған адамды жазылды деп шығарғаны үшін шағым түсті.

Бұл туралы «Президентке хат»  telegram арнасы хабарлады.

Белгілі бір себептермен дәрігерлер марқұмның денесін мәйітханада емес, ауруханада жарып, сойыпты.
Операцияға медициналық сақтандыру қорынан 2,8 миллион теңге жұмсалды. Қазіргі уақытта Алмат Қодасбаев фамилиясын «Тұрысбекұлы» деп өзгерткен. Алматы облысының әкімі Марат Сұлтанғазиевтің пәрменімен ол облыстық денсаулық сақтау басқармасының басшысы болып тағайындалды.

Еске сала кетейік, 1996 жылы еңбек жолын Іле аудандық ауруханасында хирург болып бастаған Алмат Тұрысбекұлы А.Н. Сызғанов атындағы Ұлттық ғылыми хирургия орталығында кардиохирургия мамандығы бойынша маман, кардиохирургия бөлімінің жетекші ғылыми қызметкері, кафедра меңгерушісі болды. Артынша ол С.Асфендияров атындағы Қазақ ұлттық медицина университеті кафедрасының доценті, Алматы кардиологиялық орталығының директоры, Алматы қалалық қоғамдық денсаулық сақтау басқармасы басшысының орынбасары, «Ақсай» республикалық балалар клиникалық орталығының директоры болды.