«Маратты босатыңдар»: HRF Марат Жыланбаев туралы деректі фильм түсірді

Human Rights Foundation (HRF) Dare To Dissent науқаны бойынша қазақстандық оппозициялық саясаткер Марат Жыланбаевтың ісіне арналған деректі фильм жариялады, деп хабарлайды Orda.kz.

Ұйымның мәлімдеуінше, оған кесілген жеті жылдық түрме жазасы – елдегі саяси көзқарасы өзгеше адамдарға жасалған тағы бір соққы.

Жыланбаев 2023 жылғы 3 мамырда «Қанды қаңтар» оқиғасына қатысты тәуелсіз тергеу жүргізуді талап еткені үшін қамауға алынды. Бастапқыда ол «заңсыз» митингіге қатысқаны үшін әкімшілік жазаға тартылғанымен, 23 мамыр күні әкімшілік қамаудан шыққан сәтте бірден қылмыстық айыптар бойынша қайта ұсталды. Оған «экстремистік ұйымның қызметіне қатысу» және оны «қаржыландыру» баптары бойынша айып тағылды.

HRF сот процесінің жабық режимде өткенін атап өтті. 2023 жылғы 29 қарашада сот оны барлық айыптар бойынша кінәлі деп тауып, жеті жылға бас бостандығынан айыру және үш жыл бойы қоғамдық-саяси қызметпен айналысуға тыйым салу туралы үкім шығарды.

Адам құқықтарын қорғау ұйымы БҰҰ-ның тиісті құрылымдарына Марат Жыланбаевты дереу босату туралы ресми өтініш жолдады. HRF Қазақстан билігін оппозицияға қысым көрсетуді тоқтатып, азаматтардың негізгі құқықтарын құрметтеуге шақырды.

Фильмде Марат Жыланбаевтың адвокаты Мейіржан Досқараев пен адам құқықтары жөніндегі халықаралық заңгер Кети Холланд сөз сөйледі. 

Олар Марат Жыланбаевтың әлемге танымал тұлға екенін айтты. Сонымен қатар «экстремист» деген айыппен көптеген саяси тұтқындар отырғанын және түрмедегі жағдайлардың өте нашар екенін атап өтті.