Марат Жыланбаев екі айға қамауға алынды

25 мамырда Астана қаласының мамандандырылған ауданаралық тергеу соты тіркелмеген «Алға, Қазақстан» оппозициялық партиясының 60 жастағы төрағасы Марат Жыланбаевты екі айға қамауға алу жөнінде санкция шығарды.

Бұл туралы Азаттық хабарлайды.

Гиннесстің рекордтар кітабына еніп, дүйім жұртқа танылған супермарафоншы, кейінгі жылдары билікті сынап, наразылық акцияларына қатысып жүрген 60 жастағы Марат Жыланбаев Қылмыстық кодекстің 405-бабы («сот тыйым салған ұйымның жұмысына қатысу») мен 258-бабында («террористік не экстремистік әрекетті қаржыландыру») көрсетілген іс-әрекетке барған деген күдікке қалып отыр.

Тергеу органы қаулысында «белсенді Қазақстанда тыйым салынған «Қазақстанның демократиялық таңдауы» қозғалысының ұйымдастырушылары мен қатысушыларының әлеуметтік желісіндегі чатында» болғандығы жазылған.

Тергеу органының шешімінде «Жыланбаевтың ҚДТ басшысы Мұхтар Әбіләзовпен және оның «шетелдегі штабымен» байланыста болып, олардан «конституциялық құрылымды өзгертуге» бағытталған тапсырма мен нұсқау алғаны» айтылған.

«Жыланбаев Әбіләзов шақырған рұқсат етілмеген митингілерге қатысып, оларды әлеуметтік желілер арқылы насихаттаған. 2023 жылы Жыланбаев Астанада болған кезінде ҚДТ экстремистік ұйымы қызметіне белсене қатысқан. 4 ақпанда ол Шымкенттегі ҚДТ белсендісіне 500 000 теңге аударған» делінген құжатта.

Белсенді өзіне тағылған айыппен келіспейді.

Мамыр айының басында Жыланбаев 20 тәулікке қамауға алынған. 23 мамырда ол уақытша ұстау изоляторынан полицияға жеткізілді.

«Алға, Қазақстан!» тіркелмеген партиясы шамамен бір жыл бойы ресми тіркеу рәсімін бастау үшін биліктен рұқсат алуға тырысқан.

2023 жылдың ақпанында Жыланбаевтың кандидатурасы депутаттыққа ұсынылды, бірақ кейін сот оған «уақытынан бұрын үгіт жүргізді» деп айыппұл салды.