Марат Әйтімов: Биліктің халыққа тура қарайтын мезгілі жетті

Бүгін сайлауға дауыс беруге келген  Димаш Құдайбергеннің ұстазы Марат Әйтімов қымбатшылықтан халықтың тұрмысы қиындап кеткенін айтты.

Тілшілерге сұхбат берген Қазақстанның еңбек сіңірген қайраткері биліктен халықтың жағдайын жасауды сұрады.

– Бүгін жауапты күн. Халықтың оянып, жаңа бір өмірге бетбұрыс жасайтын кезі келген сияқты. Халық күтуден шаршады. Үміттенемін – біздің өміріміз жақсаруы тиіс. Қымбатшылық мәселесі  қайта-қайта көтеріліп жатыр. Қарапайым халық үшін қиын. Алысқа бармай-ақ туысқандарымның ішінде тұрмыс-тіршілігі төмен адамдар бар. Жалақысы төмен, қымбатшылық қысқанда өмір сүру өте қиын. Биліктің халыққа тура қарайтын уақыты келді. Халық билікке емес, билік халыққа жұмыс істейтін уақыт жетті, - дейді Әйтімов.

Әнші Димаш Құдайбергенмен әлі де тығыз байланыста екенін айтты. Болашақта шәкіртімен бірге ән айту жоспарында бар.

– Бір әнді Димашпен қосылып орындаймыз деген жоспарда бар. Әзір жүзеге аспай жатыр. Жаңа ән немесе халық әні болуы мүмкін, - деді ол.

Айта кетейік, Ақтөбеде қала бойынша 162, облыс аумағында 517 дауыс беру учаскесі жұмыс істеп тұр.

Ардақ Ерубаева, Ақтөбе