Мақпал Жүнісоваға қызы Мерей ерекше тосынсый жасады

11 қаңтарда әнші ҚР Халық әртісі Мақпал Жүнісова 59 жасқа толды. Анасын меншікті мерекесімен құттықтаған Мерей Заманбекқызының видеосы желіде қызу талқыланып жатыр.

Жұрттың жүрегін елжіреткен бейнежазбаны Халық әртісінің өзі жеке парақшасына жүктеген. Аталған роликте Мақпал ханымға қызы ерекше алғысын айтып, әрдайым қасында болатынын жеткізіпті.

– Анашым, туған күніңіз құтты болсын. Сізге шын жүрегіммен тек қана бақыт тілеймін. Армандарыңыз орындала берсін. Әрқашанда мен сіздің жаныңызда, сіз менің жанымда болыңыз. Ана мен қызы ретінде осылай ара-қатынасымыз ешқашан бұзылмасын. Әрқашанда бір-бірімізді сүйеп, қолдап жүре берейік. Мен сізді шын жүрегіммен сүйемін, мама. Осындай анамның барына шын жүрегіммен шүкіршілік етемін, алғысым шексіз. Мен сіз мақтансын деп өмір бойы тырысамын, – деді Мерей Заманбекқызы.

Қызынан дәл осындай жылы лебізді естеген Мақпал Жүнісованың көңілі босап, көзіне жас алғанын аңғаруға болады. Халық әртісі де Мерейге ерекше ризашылығын білдірді.

– Жаным қызым, бақытты бол. Әумин, – деді Мақпал Жүнісова.

Айта кетейік, былтыр мамыр айында Мақпал Жүнісова жалғыз қызына қатысты халыққа тосыннан видеоүндеу жолдағанын жұрт жақсы біледі. Онда Мерейдің өз қызы еместігін, туған інісінің баласы екенін ашық айтты.