Маңғыстаудағы Бейнеу полигонында әскери қызметші қаза тапты

17 ақпанда Маңғыстау облысы аумағындағы Бейнеу полигонында жоспарлы далалық атыс жаттығулары кезінде мерзімді қызметтегі әскери қызметші оқ жарақатынан оқиға орнында көз жұмды, деп хабарлайды Orda.kz.

Бұл туралы Қазақстан Республикасы Қарулы Күштері Құрлық әскерлерінің баспасөз қызметі хабарлады.

Алдын ала мәлімет бойынша, Құрлық әскерлерінің «Батыс» өңірлік қолбасшылығына қарасты әскери қызметші қарумен жұмыс істеу кезінде өмірге қауіпті жарақат алған.

Оқиға бойынша Батыс өңірі әскери-тергеу органдары қылмыстық іс қозғады. Қазіргі уақытта сотқа дейінгі тергеп-тексеру жүргізіліп, барлық мән-жай мен себептер анықталып жатыр.

Қорғаныс министрінің тапсырмасымен оқиға орнына комиссия жіберілді. Оны қорғаныс министрінің орынбасары, генерал-майор Шайх-Хасан Жазықбаев басқарады.

Қарулы Күштердің қолбасшылығы қаза тапқан әскери қызметшінің туған-туыстары мен жақындарына көңіл айтып, отбасына заңнамаға сәйкес барлық қажетті көмек көрсетілетінін мәлімдеді.