Маңғыстау облысындағы жерасты Бекет-Ата мешіті көгілдір отынмен жылитын болды

Бейнеудегі жерасты Бекет-Ата мешіті көгілдір отынға қосылды, деп хабарлайды Маңғыстау облысы әкімдігінің баспасөз қызметіне сілтеме жасап Orda.kz.

Жартасқа қашалған мешіт қазақтың дәстүрлі киіз үйіне ұқсайды. 23 наурызда Бейнеу ауданында орналасқан көне жерасты Бекет-Ата мешітіне көгілдір отын берілді.

«2025 жылдың қаңтарында жеке кәсіпкер есебінен басталған жоба үш ай уақыт ішінде толығымен аяқталды. Жалпы ұзындығы 3,4 шақырым болатын газ құбырының тартылуы мешітке келушілерге қолайлы жағдай туғызып қана қоймай, тарихи орынның сақталуына да оң әсерін тигізеді» деп жазылған хабарламада. 

Шарада сөз алған Бекет атаның жетінші ұрпағы Қалымбегі Ташов мешіттің көгілдір отынға қосылуы ата-баба мұрасына деген құрметтің белгісі екенін ерекше атап өтті.

«Қасиетті, киелі жерлерді сақтау – келешек ұрпақтың үлесінде, осы игі іске атсалысқандарға алғысым шексіз, әл-ауқатымыз арта берсін», – деді қария.

Бекет ата жерасты мешіті – Қазақстанның ұлттық киелі орындарының бірі. Жартасқа қашалған және үш бөлмеден тұратын бұл бірегей сәулет үлгісі 18 ғасырда салынған. Мешіттің негізгі бөлмесі дөңгелек пішінде жасалған, ал төбесі жалпақ күмбезді.