Маңғыстау облысында теміржолшылар ереуілге шықты

Маңғыстау облысы Бейнеу ауданының теміржолшылары өз құқықтары тапталып, еңбек талаптары дұрыс орындалмады деп отыр.

29 шілдеге дейін теміржол компаниясының басшысы Сауранбаев қызметінен кетсін деген талап қойып отыр. Бұл бейнежазба әлеуметтік желілерде жарияланды.

«Бүгін 8 шілде 2024 жыл. ҚР президенті Тоқаев және премьер-министр Олжас Бектеновке, Маңғыстау облысының әкімі Нұрдәулет Қилыбайға, Бейнеу ауданының әкімі Шалбаевқа үндеу. Біз, Бейнеу ауданының теміржолшылары еңбек дауларына қойылған талаптардың орындалмауына байланысты, еңбек жағдайының, әлеуметтік жағдайдың нашарлауына байланысты Қазақстан теміржол компаниясының президенті Нұрлан Сауранбаевтың жұмыстан кетуін талап етеміз. Қойылған талаптар шілде айының 29-на дейін орындалмаған жағдайда және жұмыс беру талаптарынан заңсыз қудалаулар мен қысым көрсетілген жағдайда жұмысты тоқтатуға мәжбүр боламыз» деп отыр теміржолшылар.

Еске сала кетейік, Бейнеу ауданының тарихы темір жолмен тығыз байланысты. Қазіргі таңда бұрыннан келе жатқан ата кәсіпке айналған теміржол қызметіндегі еңбек талаптарының орындалуына жұмысшылар наразы болып отыр.