Маңғыстау облысында балалар жаппай уланып, полиция қылмыстық іс қозғады

Өңірде бірлескен арнайы штаб құрылып, облыс әкімінің орынбасары Звира Есбергенова аурухананы аралады, деп хабарлайды Orda.kz Lada басылымына сілтеме жасап.

Жергілікті денсаулық сақтау басқармасының баспасөз қызметі хабарлағандай, ата-аналарға қажетті психологиялық көмек көрсетіліп, балалардың жағдайы тұрақтанды.

«Улану себебін анықтау үшін Маңғыстау облысы бойынша санитарлық-эпидемиологиялық қадағалау департаментіне хабарлама жіберілді. Аталған факті бойынша Қазақстан Республикасы Қылмыстық кодексінің 304-бабының 1-бөлігі бойынша қылмыстық іс қозғалды», деп хабарлады департамент.

6 қыркүйекте Бесшоқы ауылындағы № 8 мектептің асханасында бірінші ауысымның 1-4 сынып оқушылары уланып қалды. Балалар ауруханаға іштері ауырып, жоғары температурамен жеткізілді. 67 бала медициналық көмекке жүгініп, оның 13-і ауруханаға жатқызылды. 52 бала үйде бақылауда.