Маңғыстау облысы ПД алтын жалатылған сағаттарға 2 миллион теңге жұмсамақ

Маңғыстау облыстық полиция департаменті алтын жалатылған әрі былғары бауы бар сағат сатып алуды жоспарлап отыр, деп хабарлайды Orda.kz.

Бұл туралы ақпарат мемлекеттік сатып алулар сайтында пайда болды. Lada.kz  хабарлауынша бөлім бірден 180  сағатқа тапсырыс берген екен. Сағат үшін бюджеттен 2 миллион теңгеге жуық қаржы бөлінген, бірақ нақты қандай компания жеткізуші екені әлі анықталған жоқ. Өтінімді қабылдау  24 қыркүйек сағат 17:45-те жабылады.

Лоттың техникалық сипаттамасында сағат механизмі жапондық немесе швейцариялық үлгілерден кем болмауы керек деп жазылған. Анау-мынау сызаттарға төзімді әрі суға түсіп кетсе де тоқтамайтын болуы керек делінген. Сонымен қатар, тапсырыс берушінің қосымша талабы — сағаттың  міндетті түрде былғары қорабы болу керек екен.

«Әрбір сағат қара немесе қызыл былғарыдан жасалған сыйлық қорапшасына салынып, лакталған қорапта төлқұжат пен куәлік қоса берілуі керек. Бұйымның сырт жағында «Қазақстан Республикасы Ішкі істер министрлігі» логотипі және «МАҒЫСТАУ ОБЛЫСЫ ПОЛИЦИЯ ДЕПАРТАМЕНТІ» деген жазу болуы керек» деп жазылған техникалық шартта.

Маңғыстау облыстық полиция департаментінің баспасөз қызметі мұндай сағаттар қызметте ерекше көзге түскен қызметкерлер мен ішкі істер органдары ардагерлеріне мереке күндеріне орай берілетінін түсіндірді.