Маңғыстауда бұрынғы полиция подполковнигі пара алғаны үшін сотталды

Бұрынғы полиция қызметкері қылмыстық істі тоқтату үшін шетелдіктен 300 доллар алған.

Бейнеу аудандық ІІБ бастығының бұрынғы орынбасары қаңтар айында пара алғаны үшін сотталды, деп жазады Lada.kz. Қылмыстық істі тоқтату үшін Тәжікстан азаматы оған 300 доллар алып келген.

«Құқық қорғау органы қызметкері қылмысы үшін Қазақстан Республикасы Қылмыстық кодексінің 366-бабының 1-1-бөлігіне сәйкес параның 30-дан 50-ге дейінгі мөлшерінде айыппұл немесе мүлкі тәркіленіп, белгілі бір лауазымдарды атқару немесе белгілі бір қызметпен айналысу құқығынан өмір бойына айырыла отырып, алты жылға дейінгі мерзімге бас бостандығынан айырылады» деп хабарлады Бейнеу аудандық сотының баспасөз қызметі.

Сот үкімімен экс-полицей кінәлі деп танылып, оған мемлекеттік қызметте лауазымдарды атқару құқығынан өмір бойына айырумен параның 25 еселенген сомасы – 3 474 825 теңге айыппұл салынды.
Бұрынғы тәртіп сақшысы өз кінәсін мойындап, өкініп, жеңілдетілген жаза алды. Сот талқылауы барысында ол уақытша ұстау изоляторында болғандықтан, сот айыппұл сомасын 2 384 625 теңгеге дейін қысқартты. Сот үкімі әлі заңды күшіне енген жоқ.