Маңғыстау облысы полиция департаменті жаңаөзендіктер туралы мәлімдеме жасады

Бүгін, 12 сәуір күні таңертең Жаңаөзен қаласында бір топ азаматты «қала тұрғындарының көлік қозғалысына кедергі келтіріп, жолды жауып тастады» деген желеумен полиция қызметкерлері ұстап әкеткен.

Полиция қызметкерлері ұсталған азаматтарды Жаңаөзен қаласы полиция басқармасына жеткізді.

«Қоғамдық қауіпсіздікті және көлік құралдарының кедергісіз қозғалысын қамтамасыз ету үшін полиция қызметкерлері оларды профилактикалық әңгіме жүргізу үшін Жаңаөзен қаласы полиция басқармасына жеткізді. Мұндай іс-әрекет ҚР ӘҚБтК-нің 614-бабы (Көлiк құралдарының жүруіне кедергi келтіру) бойынша шара қолдануға және ол 10 АЕК мөлшерінде айыппұл түрінде жауаптылыққа әкеп соғады», - деп хабарлады Маңғыстау облысы полиция департаментінің баспасөз қызметі.

Еске салайық, кеше Астанада ереуілге шыққан мұнайшыларды арнайы жасақ өкілдері ұстап әкеткен еді. Кейін Жаңаөзен қаласының бір топ тұрғыны әкімдік алдына жиналып, Астанада ұсталған жұмысшыларды босатуды талап етті.