Мамин: вакциналау қарқынын барынша ұлғайту қажет

Премьер-министр Асқар Мамин үкімет отырысында жаз айларында қазақстандықтарды вакциналауды ұлғайту керектігін айтты.

Бұл туралы Orda.kz хабарлады.

– Жалпы санитарлық-эпидемиологиялық жағдай жақсарды. Вирус жұқтыру деңгейі төмендеп келеді, бір аптада 30 пайызға азайды. Елорда ғана «қызыл» аймақта қалды. Осы ретте, әкімдік қосымша шаралар қабылдауы керек. Жалпы 10 өңір, яғни басым бөлігі «жасыл» аймақта, 6 өңір «сары» аймақта. Тұрғындардың вакцина алуы мен эпидемияға қарсы жүргізілген шаралардың нәтижесінде Қазақстан «жасыл» аймаққа кірді, - деді Мамин.

Оның айтуынша, бүгінгі күні 2,4 миллионға жуық адам вакцинаның бірінші компонентін және шамамен 1,3 миллион адам екінші компонентін алды.

– Әкімдіктер мен денсаулық сақтау министрлігі жаз кезінде вакциналау қарқынын барынша ұлғайтуы қажет, әсіресе Маңғыстау, Ақмола, Қостанай облыстары мен Нұр-Сұлтан қаласында. Барлық деңгейдегі әкімдер вакциналау мәселесін жеке бақылауға алуы тиіс, - деді премьер.