Мамин вакциналау қарқынын арттыруды тапсырды

Үкімет басшысы Асқар Маминнің төрағалығымен Үкімет отырысы өтіп, елдегі санитарлық-эпидемиологиялық жағдай қаралды.

Бұл туралы Orda.kz хабарлайды.

Денсаулық сақтау бірінші вице-министрі Марат Шоранов Қазақстандағы санитарлық-эпидемиологиялық жағдайдың жақсаруы жалғасып жатқанын айтты. Барлық өңірлерде ауру деңгейінің, стационарлық және амбулаториялық емдеудегі ауыр жағдайлар санының төмендеуі байқалады. Вирустың репродуктивтілік индексі – 0,93. Инфекциялық төсек-орын жүктемесі – 33%, реанимациялық төсек-орын жүктемесі – 27%.

Ресми ақпарат бойынша, бүгінгі күні 8,3 млн астам адам вакцинаның бірінші компонентін, 7,5 млн астам адам екінші компонентін алды.

Асқар Мамин көрші елдерде санитарлық-эпидемиологиялық жағдайдың күрделенгенін айтып, барлық өңірлерде шектеу шараларын қатаң сақтауды тапсырды. Сондай-ақ, мониторинг топтарының күшейтілген жұмыс режимін қамтамасыз етуді тапсырды.

«Нұр-Сұлтан қаласының, Солтүстік Қазақстан, Маңғыстау, Қостанай, Ақмола, Батыс Қазақстан облыстарының әкімдеріне коронавирусқа қарсы вакциналау қарқынын арттыру тапсырылды» делінген primeminister.kz сайтында.