Мамандар Каспий теңізіне құйылған қалдықтар туралы айтты

Жақында әлеуметтік желіде Каспий теңізіне құбырдан аққан лас судың теңізге құйылып жатқаны түскен видео тарады. Видео авторы бұл қалдық суы болуы мүмкін екенін болжаған. Ол қонақ үй аумағынан теңізге дейін тартылған құбырды тапқан.

«Барлық қалдықтар осы құбыр арқылы қонақ үйден теңізге барып құяды» дейді видео авторы.

Inaktau.kz басылымы мамандар қажетті сынамалар алғанын хабарлады.

«Қазіргі уақытта тәуелсіз экологтар, қоғам белсенділері мен «Экожер» аймақтық экология қауымдастығының Маңғыстау облысы экологтар кеңесі мүшелерін жағдайды бағалау үшін осы іске тарту жоспарланып отыр» деді Маңғыстау облысы экология департаментінің мамандары.

Тексеріске балық шаруашылығы басқармасы, су инспекциясы, облыстық орман шаруашылығы мен жануарлар дүниесі инспекциялары қатысады.