Мамайды түрмеге отырғызу - қылмыс - Human Rights Watch  

Беделді халықаралық Human Rights Watch (HRW) құқық қорғау ұйымы өзі саяси тұтқын деп санайтын Демократиялық партия жетекшісі Жанболат Мамайға қатысты жаңа мәлімдеме жасады. Бұл оппозиция лидеріне «жаңа» айып тағылуымен байланысты.

«Бір қызығы, бұл «жаңа» айып прокурорлар оның болжамды әрекеттерін «бейбіт жиындарды ұйымдастыру мен өткізуді бұзу» деп қайта саралап, дәл осындай айыпты алып тастағаннан кейін екі ай өткен соң шықты» делінген хабарламада.

Одан кейін Мамайға қатысты қылмыстық іс қозғалып, сот процесі 6 ақпанда жалғасуы керектігі ескертіледі. «Мамай әлі де үйқамақта. Қазақстан шын мәнінде тәуелсіз оппозициялық партияларға жол бермейді. Мамайдың партиясы тіркеле алмады» деп атап көрсетті HRW.

Айыптау қорытындысына қатысты прокуратура тағайындаған сараптама негізінде «Мамайдың зорлық-зомбылық жасағаны немесе зорлық-зомбылыққа шақырғаны туралы ештеңе айтылмаған, өйткені оның бұл әрекетті жасағанына дәлел жоқ» делінген.

Қорытындылай келе, құқық қорғаушылар: «Саяси реформаға шақыру – қылмыс емес, бірақ Мамайды 10 жылға темір торға отырғызу, әрине, қылмыс болар еді» деп қорытындылады.

Еске салсақ, бұған дейін HRW Мамайға жаппай тәртіпсіздік ұйымдастырды деген айыптың негізсіз екенін мәлімдеген болатын.

«Қазақстан қаңтардағы оқиғалар кезінде сөз бостандығына құқықтарын бейбіт түрде жүзеге асырғаны үшін саяси және азаматтық белсенділерді қылмыстық жауапкершілікке тартуды тоқтатуы керек» деді HRW Еуропа және Орталық Азия бойынша директоры Хью Уильямсон маусым айындағы мәлімдемесінде.