Малшыны құлдықта ұстаған полицейге қатысты тергеу басталды

Түркістан облысының полиция департаменті 28 жастағы жергілікті тұрғынды еңбек құлдығында ұстады деген қызметкерге қатысты қызметтік тергеу бастады. Жұмысшы өз-өзіне қол жұмсады, оның денесі мал бағып жүрген ферма маңынан табылды.

Бұл туралы Orda.kz хабарлады.

Белгілі болғандай, ер адам құлдықта болған.

Марқұм Бақытжан Бердалиевтің анасының айтуынша, оның баласы қарызынан құтылу үшін малшы болып, жұмысқа кірген. Бірақ ол жұмыс емес, нағыз құлдық болып шықты. Марқұмның жақындары бір ауыздан оның өліміне құлдықта ұстаған полицей кінәлі дейді.

Полиция қызметкері жоғалған малдарын марқұмның мойнына іліп, тағы да жұмыс істетпекші болған. Оны өлімге жоғалған мал итермелеуі мүмкін. Себебі, ол сол үшін тағы біраз жұмыс істеуі керек еді.

– Ішкі қауіпсіздік басқармасы полиция қызметкеріне қатысты қызметтік тергеу бастады. Тергеу барысында оқиғаға құқықтық баға беріліп, заңды шешім қабылданады, - деп түсініктеме берді Түркістан облысының полиция басқармасы.

Қазіргі уақытта Түркістан облысы Полиция департаментінің тергеу басқармасы ҚР Қылмыстық кодекстің 105-бабы бойынша сотқа дейінгі тергеу жүргізуде. Күдікті 3 жылдан 8 жылға дейін бас бостандығынан айрылуы мүмкін.

Оқиғаның барлық мән-жайы анықталды, қажетті сараптамалар тағайындалды.