Макс Боқаев бостандыққа шығатын болды

Түзету колониясы Макс Боқаевқа бостандыққа шығудың алдын-ала мерзімі - 2021 жылдың 4 ақпаны екендігін айтты. Бірақ бұған дейін оны қадағалау бойынша сот процесі өтеді.

Бұл туралы Боқаевтың өзі 6 қаңтар күні кешкісін «Уральская неделяның» бас редакторы Лұқпан Ахмедьяровпен телефон арқылы сөйлесу кезінде мәлімдеді.

"Бүгін олар маған босату күні - 4 ақпан екенін айтты. Бірақ бұл әлі де сөз жүзінде, мен бұл туралы жазбаша ресми түрде хабарлауды талап еттім. 19 қаңтарда сот отырысы өтеді, онда мені босатқаннан кейінгі қадағалау тәртібі белгіленуі керек. 2 жыл бұрын қылмыстық-атқару кодексіне түзетулер енгізілді, соған сәйкес экстремистік баппен сотталғандардың барлығы жалпы бақылауға алынады. Түзету жолына түсті ме, жоқ па деген бақылау. Бірақ мен оларға бірден менің «түзелуіме» бекер сенетіндіктерін айттым", - деді Макс Боқаев.

Оның айтуынша, желтоқсан айының ортасында түзету колониясының әкімшілігі оған қысым жасамақ болған.

«15 желтоқсанда мен «Ақ Жайық» газетінің бас редакторы Азамат Майтановпен қысқа кездесу өткізуге тиіс едім. Бірақ подполковник Тәженов бұл кездесуге соңғы сәтте тыйым салды. Келесі күні, 16 желтоқсанда, сол Тәженов менің отбасыммен белгіленген 15 минуттық телефон әңгімесін де болдырмады. Тәженовке ҰҚК бақылаушылары менің телефон қоңырауымнан айыруға кеңес бергенін түсінемін, өйткені олар сол күнгі наразылықтардан  қорқады. Олар бұл наразылықтарға мені қандай да бір ықпал ете алады деп ойлайды», - деді Макс Боқаев.

Белсенділер Макс Боқаев пен Талғат Аян 2016 жылы сәуірде Атырауда 4000-ға жуық адам жиналған елдегі ең ірі бейбіт митингке қатысқаны үшін бес жылға сотталды. Оларға «әлеуметтік алауыздықты қоздырды, қасақана жалған ақпарат таратты және жиналыстарды ұйымдастыру мен өткізу тәртібін бұзды» деген айып тағылған болатын. Сонымен бірге билік бұған дейін Боқаев пен Аян жер жөніндегі митингілерге қатысқаны үшін жауапқа тартылмайды деп сендірген болатын.

2019 жылы 14 наурызда Еуропарламенттің Қазақстан билігін елдегі барлық саяси қуғын-сүргін түрлерін тоқтатуға шақыратын қарар қабылдағаны белгілі болды. Еуропалық парламент сонымен бірге «қазіргі уақытта темір торда отырған барлық белсенділер мен саяси тұтқындарды» тез арада босатуға шақырып, саяси тұтқындар қатарында Макс Боқаевты да атаған.

2019 жылдың 29 шілдесінде Талғат Аянның мерзімінен бұрын босатылғаны белгілі.