Франция Президенті Ресей мен Қытай вакцина арқылы «жаңа бір қақтығысты жағдай» тудырмақшы

Еуроодақ коронавирусқа қарсы вакцина шығаратын, бірақ оны Одақ құрамындағы мемлекеттермен бөліспейтін елдерге екпе бермеуге үндеді. Бұл Одақ басшыларының бейнеконференция түрінде өтіп жатқан саммитінде айтылған бастама.

Форум қарастыратын күн тәртібіндегі басты мәселелердің бірі — Еуропадағы вакцина мәселесі. Тағы бір басты тақырып — екпе алғандар үшін жасыл паспорт дайындау және сыртқы саясат. Бастысы вакциналау қарқынын арттыру мен препаратты жылдам жеткізу болып отыр. Күн тәртібінде Еуроодақ пен Түркия қарым-қатынасын талқылау да бар.

Саммиттің екінші күні Ұйымға мүше елдер басшылары цифрлық еуроны құруды пысықтап, пандемияның үшінші толқынына қарсы тұру мәселелерін талқылады.

— Осы жазда біз Еуроодақ аймағындағы ересек адамдардың 70 пайызын вакциналауды жоспарлап отырмыз. Сондықтан компаниялар препаратты өзге аймақтарға тасымалдамас бұрын Одаққа жеткізу бойынша өз міндеттерін орындауы тиіс. Бұл ең алдымен АстраЗенека компаниясына қатысты мәселе, - деді Еурокомиссия президенті Урсула Фон Дер Ляйен.     

Франция Президенті Эммануэль Макрон Еуропаға коронавирусқа қарсы вакцина шығаруда дербес саясат жүргізуге шақырды. Ол вакцина төңірегіндегі ахуалды «әлемдегі жаңа бір қақтығысты жағдай» деп қарастырды. Франция Президенті бұны Ресей мен Қытайдың екпе арқылы ықпал етуге тырысуынан деп есептейді.