Майқайыңда қыз зорлық туралы айтса да анасы сенбеген

Павлодар облысының әкімі Майқайың ауылындағы ағайынды балаларға қатысты мәлімдемесінде, қыз ұзақ уақыт бойы зорлық көргенін анасына айтқан, деп хабарлайды Orda.kz.

Орталық коммуникациялар қызметінде сөз сөйлеген Асайын Байхановтың айтуынша, өңірде балаларға қатысты зорлық-зомбылық бойынша 30 дерек тіркелген. Жақында ғана белгілі болған жағдайда, ағайынды балалардың ұзақ уақыт бойы зорлық көргені анықталып, қыз бұл туралы анасына хабарлаған.

«Майқайыңда қыз зорлыққа тап болғанын анасына айтқан, бірақ ол сенбеген. Қыз анасымен және өгей әкесімен бірге тұрып келген. 2 жыл бұрын туған әкесіне де айтқан екен. Алайда, ата-анасы қызының сөзіне қатысты ешқандай шара қолданбаған. Өкінішке қарай, осындай жағдайлар көп кездеседі», – деді Байханов.

Сонымен қатар, 30 жағдайдың 25-де балаларды зорлау фактісі өз үйлерінде, өз отбасында болады.  

«Өңірдегі бұл жағдайлардың көбісі 2017, 2018, 2019, 2020, 2021 жылдары болған. Қазіргі уақытта біз осындай барлық жағдайларды қарастырып, балалардың ештеңеден қорықпай ашылуы үшін олармен жан-жақты жұмыс жүргізіп жатырмыз», – деді облыс әкімі.  

Айта кетейік, Павлодар облысында кәмелет жасына толмаған ағайынды ұл мен қыздың жыныстық зорлық-зомбылыққа ұшырағаны туралы белгілі болған еді.