«Майқайыңалтын» АҚ басшылары үйқамаққа қарсы болды

Алтын өндіретін кәсіпорынның қызметкерлері бұлтартпау шарасына шағым түсірмек болғанымен, облыстық сот оны күшінде қалдырды, деп хабарлайды Orda.kz.

18 қыркүйек күні Павлодар қаласының мамандандырылған тергеу сотында «Майқайыңалтын» АҚ-ның алты басшысына қатысты бұлтартпау шарасы қаралды. Айыпталушылар қатарында компанияның бұрынғы бас директоры Қуаныш Ботин, оның орынбасарлары, бас инженер, сондай-ақ өндіріс директоры мен оның орынбасары бар.

Еске салайық, қайғылы оқиға 4 қаңтарда болған еді. «Майқайыңалтын» кенішінде жердің жоғарғы қабаты опырылып түскен. Оқиға салдарынан пайда болған шұңқыр түріндегі апат орнына келген «РЦШ ПВАСС» ЖШС құтқарушылар автобусын топырақ басып қалды. Төрт құтқарушының барлығы қаза тапты, ал соңғысының денесі жарты жылдан кейін ғана табылды.

Топтық жазатайым оқиға арнайы тергеу нәтижелері бойынша болған жағдайға толықтай жұмыс беруші жауапты деп танылды. Тергеу актісінде болған апатқа себепкер болған алты жауапты тұлғаның әрекеттері мен әрекетсіздіктері көрсетілген.

Кәсіпорын өкілдері бірнеше рет тергеу қорытындыларымен келіспей, сотқа жүгінген болатын. Олар бұл оқиға үшін жауапкершілік «РЦШ ПВАСС» компаниясында деп мәлімдеп, егер техникалық құралдар уақтылы қолданылғанда апаттың алдын алуға болатындығын,  қайғылы жағдай болмайтынын алға тартты. Алайда сот инстанциялары олардың талаптарын қабылдамады.

Павлодар облысы полиция департаменті ҚР Қылмыстық кодексінің 277-бабының 3-бөлігі («Тау-кен немесе құрылыс жұмыстарын жүргізу кезінде қауіпсіздік ережелерін бұзу, абайсызда екі немесе одан көп адамның өліміне әкеп соқтыру») бойынша тергеуді жалғастырып жатыр.