Майя Санду екінші президенттік мерзімге сайланды

Молдовадағы президенттік сайлаудың екінші кезеңінде 55,26% дауыс жинаған Майя Санду екінші президенттік мерзімге сайланды, деп хабарлайды Orda.kz.

Молдова Орталық сайлау комитетінің хабарлауынша, сайлау учаскелерінен алынған хаттамалардың 98,9 пайызы өңделіп, Майя Сандудың озып шыққаны белгілі болды. Ол 55,26% дауыс жинап, екінші мерзімге қайта сайланды.

Бұған дейін ел ішіндегі сайлау учаскелерінде көш бастап, 51,19% дауыс жинаған Александр Стояногло сайлаудың екінші кезеңінде 44,76% жинап, жеңіліп қалды.

Ресми мәліметтерге сәйкес, шетелдегі дауыстарды санау қорытынды нәтижелерге әсер етті. Жеңісті эмигранттар қамтамасыз етті.

«Шетелдегі молдовалықтар жүректері Молдова деп соғып жатқанын тағы да көрсетті», — деді Санду.

Х әлеуметтік желісіндегі парақшасында Майя Санду сайлаудағы жеңісі туралы жариялап, сайлаушыларға алғысын білдірді.