«Маған жала жабылды»: Актер Асқар Жұмабек мәлімдеме жасады

Актер Асқар Жұмабек жазасын өтеп шыққаннан кейін әлеуметтік желіде бейнежазба жариялап, жағдайға қатысты өз ұстанымын айтты. Оның сөзінше, жәбірленуші болған оқиғаны толық әрі шынайы жеткізбеген, деп хабарлайды Orda.kz.

Жұмабаев өз сөзінде біреуді жамандап, соның есебінен хайп жасауды қолдамайтынын атап өтті.

«Менің өз ұстанымым бар, өзімді құрметтеймін. Біреуді жамандап, соның есебінен хайп жинайтын адам емеспін. Бұл жерде де мәселе — хайпта», — деді актер.

Ол егер шынымен кешірім сұрауға негіз болса, оны жасырмай, ашық түрде жариялайтынын айтты. Алайда қазіргі тараған ақпараттың шындыққа сәйкес келмейтінін жеткізді.

«Егер мен біреуден кешірім сұрасам, оны интернетке шығарып, жариялайтын едім. Ал қазір тараған ақпарат — шындыққа жанаспайды. Тіпті «физикалық шабуыл болды» деген сөздер айтылып жатыр. Бұл — өтірік. Ондай нәрсе болған жоқ», — деді ол.

Актердің айтуынша, жағдай әдейі бұрмаланып, қоғамға басқа қырынан ұсынылған.

«Мені оятқан соң осылай ашуланды деген. Керісінше, мен ол адамға рахмет айтамын оятқанына. Бірақ жағдайды бұрмалап, халыққа мүлде басқа түрде жеткізді. Соның кесірінен адамдар қате ой қалыптастырды», — деді Жұмабек.

Сондай-ақ ол өз тәрбиесіне сүйене отырып, әйелге қол көтеру оның қағидатына қайшы екенін мәлімдеді.

«Мен ондай тәрбиемен өскен жоқпын. Әйел адамға қол көтеру — менің қағидамда жоқ. Әкем де, анам да бір-біріне дөрекі сөйлеген емес. Сондықтан маған тағылған айыптар — негізсіз», — деді ол.

Жұмабаев жанжал жұмыс барысындағы түсініспеушілік болғанын алға тартты. Оның айтуынша, ол оқиға болған күні байланысқа шығуға тырысқанымен, жауап ала алмаған.

«Иә, өмірде әртүрлі жағдай болады, адамдар ұрысады. Бұл — жұмыс барысындағы мәселе. Мен сол күні хабарластым, бірақ жауап болмады. Соған қарамастан, жағдайды ушықтырмай, сабыр сақтадым», — деді актер.

Алайда кейін бұл жағдайдың өзгеше сипатта таралғанын айтты.

«Бірақ кейін бәрі басқаша көрсетілді: «ұрыпты, тепті» деген сияқты ауыр айыптар айтылды. Бұл — жала. Заң бойынша мұндай нәрсеге жауапкершілік бар», — деді ол.

Сонымен бірге, актер қажет болған жағдайда заң аясында жауап талап ете алатынын, бірақ әзірге ондай қадамға бармағанын жеткізді.

«Мен де принципке салсам, жауап талап ете аламын. Бірақ әзірге оған бармай отырмын», — деді Жұмабек.

Ол әркімнің өз шындығы бар екенін мойындай отырып, өзіне тағылған айыптармен келіспейтінін тағы да қайталады.

«Ең бастысы — әркімнің өз шындығы бар. Бірақ мен бұл айтылған нұсқамен келіспеймін», — деді ол.

Сөз соңында актер өзінен халық алдында кешірім сұрау талап етіліп жатқанын айтып, оған негіз жоқ екенін жеткізді.

«Маған «халық алдында кешірім сұра» деп жатыр. Бірақ не үшін? Мен ешкімді ұрған жоқпын, қорлаған жоқпын, халыққа өтірік ақпарат таратқан жоқпын. Сондықтан себеп жоқ. Мен айтқан сөздерімнің бәріне жауап беремін. Бір грамм да өтірік жоқ. Өтірікті мүлде жек көремін», — деп қорытындылады Жұмабек.

Актер өз мәлімдемесінде айтқан сөздерінің барлығына жауап беретінін атап өтті.