Мәжілісмендер Мухоряповтың қазақ тіліне қатысты мәлімдемесіне байланысты Бас прокурорға шағымданды

23 қазан 2022 15:26 Ләззат Сұңқар

Рамиль Мухоряпов

Мәжілісмендер Chocolife компаниясының иесі Рамиль Мухоряповтың қазақ тіліне қатысты мәлімдемесіне байланысты Бас прокурорға жүгінді, деп хабарлады депутат Еділ Жаңбыршин.

«Құрметті Берік Ноғайұлы! Жоғарыда аталған мәселеге байланысты арандатушылық әрекеттерге барған Рамиль Мухоряповқа қатысты ҚР Қылмыстық кодексінің 174-бабының 1-тармағына сәйкес заңды шара қолдануыңызды сұраймыз» делінген депутаттық топтың хабарламасында.

Халық резонанс тудырған қазақстандық кәсіпкердің мәлімдемесіне депутаттар назар аударды. Олар мұндай әрекеттер елдің тәуелсіздігіне, ұлттық мүддесі мен тыныштығына қайшы және нұқсан келтіреді деп есептейді.
Жаңбыршин қоғамдағы қазіргі жағдай мемлекет тарапынан тілдің мәртебесі туралы заң қабылдайтын уақыт жеткенін көрсетеді деп жазады.

Үндеуге Е.Жаңбыршин, Е.Абақанов, Қ. Абасов, С.Адамбаев, А. Әбсеметова, Ж.Әшімжанов, Г. Әміреев, Е.Бейсенбаев, Б.Дүйсенбиев, З.Құлахметов, С.Мұсабаев, С.Нақпаев, С.Ожаев, Л.Рамазанова, Е.Сайыров, А.Сарым, Ж.Сүлейменова, Ғ. Ташқараев, М.Тәжмағамбетова, Д.Тұрғановтар қол қойған.

Еске салайық, бұған дейін Мухоряповтың қазақ тіліне, қазақтардың ұлтшылдығына, мәдениетіне қатысты мәлімдемесі әлеуметтік желіге тарап кеткен болатын. Қазақстандықтар Мухоряповтың қазақ тіліне деген көзқарасының дұрыс еместігіне, оның сұраған кешірімің шынайылығына күмәнданатындарын жазды. Көптеген тұрғындар Choco жобасының сайттарын тексеріп, платформаларда қазақ тілін таңдау мүмкіндігі жоқ екенін растады.

Артынша журналист Айбар Олжаев Мухоряповтың сөздерінің халық арасында араздық тудырғанын айтып, оны тексеруді сұрап прокуратураға жүгінді.

Жаңалықтар

барлық жаңалықтар