Мәжіліс депутаттығына кандидаттардың заң бұзушылықтары анықталды

Бас прокуратура Мәжіліс депутаттығына кандидаттар тарапынан бірқатар заң бұзушылықтарды  анықтады, деп хабарлады ведомствоның баспасөз қызметі.

«Бүгінгі таңда сайлауға қатысты сауалнама жүргізудің, сондай-ақ сайлауалды үгіт-насихат жұмыстарын жүргізудің белгіленген тәртібі мен шарттарын сақтамау көрініс тапқан бірқатар заң бұзушылықтар тіркелді. Елордада сауалнамаға қатысты мәселе болды. Кінәліге қатысты прокурордың қаулысымен, іс жүргізуді қысқарту тәртібімен ӘҚБтК-нің 120-бабының 3-бөлігі бойынша әкімшілік айыппұл салынды»  делінген сенбі күні таратқан хабарламада.

Сонымен қатар, кандидаттар мен партиялық тізімдерді тіркеу аяқталғанға дейін үгіт жүргізуге салынған тыйымды бұзудың бес фактісі анықталды. Солардың біріне сәйкес, Талдықорған қаласының тұрғыны прокурордың ұйғарымымен  ӘҚБтК-нің 102-бабы бойынша айыппұл түріндегі әкімшілік жауапкершілікке тартылды. Қалған кінәлілерге де аталған баппен сотқа беру шаралары жүргізілуде.

Нақтыланғандай, бүгіннен бастап ең белсенді кезең, яғни сайлау алдындағы үгіт науқаны  басталады. Осыған байланысты Бас прокуратура сайлауға қатысушыларға үндеу жолдады.

«Ағымдағы жылдың 19 наурызына тағайындалғандардың ерекше  маңыздылығын ескере отырып, қоғамға және тұтастай алғанда елге арналған сайлау, оларды өткізу барысында сайлау науқанына қатысушылардың барлығы заңда белгіленген талаптарды қатаң сақтауға тиіс. Әрбір бұзушылық фактісі бойынша біз заңнамада көзделген барлық заңды шараларды қолданамыз»  делінген хабарламада.