Мәдениет экс-министрі Мұхамедиұлының үкімі өзгеріссіз қалдырылды

14 қыркүйекте Астана қалалық сотының қылмыстық істер жөніндегі апелляциялық сот алқасы бұрынғы Мәдениет министрі Арыстанбек Мұхамедиұлы, Алмаз Нұразхан және Азамат Көшеновке қатысты үкімді өзгеріссіз қалдырды.

Сотталғандардың барлығының кінәсі толық дәлелденді. Адвокаттардың барлық уәждерін апелляциялық алқа растаған жоқ.

Бұл ретте сотталған, бұрынғы есепші Айым Сәдуақасоваға алқа 5 жылдан кейін жазасын өтеуге рұқсат берді.

«Сонымен қатар, сот алқасы жалғыз басты ана Сәдуақасованың жас баласының мүддесін ескере отырып, жазасын кейінге қалдыру қажеттілігімен келісті» деді төрағалық етуші судья Мұрат Солтыбаев.

Апелляциялық алқа сот-экономикалық сараптама тағайындауды орынсыз деп тапты.

Естеріңізге сала кетейік, Астана қаласының қылмыстық істер жөніндегі ауданаралық соты Арыстанбек Мұхамедиұлын 8 жылға бас бостандығынан айырған болатын.