Мәдени мұраға қол сұғу: Әкімдік тастағы петроглифтерді қорғауға уәде берді

Талдықорған маңындағы Қызылтас жеріндегі петроглиф қашалған тастарды жергілікті диорит өндіретін компания заңсыз әкетіп жатқан болатын. Талдықорған қаласының әкімі Ернат Бәзіл таңбалар қашалған мұраларымыздың жойылуына жол бермейміз деп уәде берді. 

Бұл туралы таңбаларды қорғап жүрген белсенді Сергей Алексеенок instagram парақшасында жариялады. 

«Петроглиф аңшылары» атты белсенділер биыл Талдықорған іргесіндегі Қызылтас төбесін қорғауда барын салды. Жергілікті ірі компания құрылыс материалдарының шикізаты ретінде диорит өндіріп, жол бойында петроглифтер қашалған тастарды алып жатқан болатын. Бұл жөнінде әкімдік пен осы таңбаларды қорғап жүрген «Петроглиф аңшылары» атты белсенділер отырыс өткізді. Отырыста Талдықорған қаласының әкімі Ернат Бәзіл таңбалар қашалған мұраларымыздың жойылуына жол бермейміз деп уәде берді. 

Еске сала кетейік, бұл мәселе наурыз айының ортасында президент Қасым-Жомарт Тоқаев петроглифтерді жоюға жол берілмейтінін мәлімдегеннен кейін қолға алынды.