Маңғыстаулық келіншек он екінші сәбиін дүниеге әкелді

Маңғыстаулық келіншек он екінші баласын дүниеге әкелді. Ол сегіз ұл, төрт қыз тапқан алтын құрсақты ана «Күміс алқа» мен «Алтын алқа» иегері.

Іnbusiness.kz. хабарлауынша, сәби Маңғыстау облысының Мұнайлы ауданында тұратын Айнұр Жұманбетованың отбасында туылған.

«Ұл бала табиғи жолмен туған, салмағы – 3 келі 770 грамм, бойы – 55 сантиметр. Ана мен сәбидің жағдайы тұрақты болғандықтан, үйіне шығарылды» деді облыстық «Ана мен бала» орталығының директоры Жапырақ Епенова

1985 жылғы Айнұр 18 жасында тұрмыс құрған. Сегіз ұл, төрт қыз тапқан алтын құрсақты ана «Күміс алқа» мен «Алтын алқа» иегері. Он екі баланың ішінде егіз де, үшем де жоқ.

Отбасы он екінші перзентіне Мұхаммед- Әмин деген есім берген.

Отағасы дәнекерлеуші болып жұмыс істейді, ал Айнұр үйде бала күтімімен отыр. Былтыр көп балалы ана ретінде мемлекет тарапынан арендалық пәтер алған.

«Отағасының айлығы және балалардың жәрдемақысымен ел қатарлы күн кешіп келеміз. Тұңғышым 17 жасқа толады. Биыл 11-сыныпты оқиды. Әскери қызметкер болуды жоспарлап отыр. Екінші ұл 9-сынып бітіріп, колледжге құжат тапсырып жатыр. Кішісі 1,5 жаста. Жолдасым да, өзім де көп балалы отбасынан шыққанбыз. Енді балаларымызға жақсы білім, тәрбие беріп, елге қамқор азамат қылып өсірсек арманымыз жоқ. Алла беріп жатса, әлі де бала тууға дайынмын» дейді жас келіншек.