Маңғыстаулық бірнеше жұмыс ұжымы президенттен көмек сұрады

Маңғыстау облысының бірнеше жұмыс тобы еңбек мәселесі бойынша бірден президент Қасым-Жомарт Тоқаевқа жүгінді, деп хабарлайды Lada.kz.

«Total» компаниясының Түпқараған ауданындағы Дүңге» мұнай-газ кенішінің жұмысшылары операторлар, механиктер мен электриктердің жалақысын 50 пайызға көтеруді сұрап отыр. Олар сұранысын өңірдегі өнімдердің қымбаттығымен түсіндірді.

«Біз жұмысшылардың және кәсіподақтың келісімінсіз мекеме тарапынан жасалған заңсыз қосымша келісімдер мен актілерді қарастыруды сұраймыз. Шағымдарымызды 2022 жылдың 15 ақпанына дейін шешіңіз. Әйтпесе, біз Қазақстан Республикасының заңнамасы мен нормативтік-құқықтық актілеріне сәйкес бейбіт түрде наразылық білдіреміз. Біздің компания Маңғыстау облысындағы ең беделді компаниялардың бірі, мұнай өндірудің жылдық жоспарын асыра орындап отыр, ал жұмысшылардың еңбекақысы басқа мұнай компанияларымен салыстырғанда өте төмен» дейді Total қызметкерлері.

Серіктестіктің «Planika» ЖШС жүргізушілері өздерін штатқа алуды өтініп, ел президентіне ғана емес, «ҚазМұнайГаз» басшысы Алик Айдарбаевқа да жүгінген. Айтуларынша, «ҚазМұнайГаз» еңбек шартын бұзып, жалақыны уақытында бермей отыр. Сондай-ақ қызметкерлер компания басшылығынан қысым көрсетпеуді, жұмыстан шығармауды талап етті.

Жаңаөзендегі «КаспийПрофСнаб» ЖШС қызметкерлері өздерін  «КазГПЗ» штаттық бірлігіне қабылдауды талап етуде.

Еске салайық, 2 қаңтарда Маңғыстау облысында митингілер басталып, кейін ол басқа өңірлерге тараған. Олар  саяси, әлеуметтік және экономикалық мәселелерді көтерді, атап айтқанда, жалақыны көтеруді, еңбек жағдайын жақсартуды талап етті.