Маңғыстаудың бұрынғы әкімі Сенатта ант берді

Сенаттағы отырыста Серікбай Трұмов ант берді.

Бұл туралы Orda.kz хабарлады.

Отырыста Сенат төрағасы Мәулен Әшімбаев мемлекет басшысының жарлығымен Серікбай Трұмовтың Сенат депутаты болып тағайындалғанын, өзінің еңбек жолында Маңғыстау облыстық мәслихатының хатшысы, қала мен облыстың әкімі болып жұмыс істегенін еске салды.

– Мен Қазақстан халқына адал қызмет етуге, Қазақстан Республикасының тұтастығы мен тәуелсіздігін нығайтуға, оның Конституциясы мен заңдарын қатаң сақтауға, маған сеніп тапсырылған депутаттың жоғары міндеттерін адал орындауға ант етемін, - деді Трұмов.

Серікбай Трұмовтың аграрлық мәселелер және ауылдық аумақтарды дамыту комитетінде жұмыс істейтіні белгілі болды.

– Сіз еліміздің мүддесі үшін жемісті жұмыс жасай бересіз деп сенеміз. Мен сізді тағы да қызметке тағайындалуыңызбен құттықтаймын және сәттілік тілеймін, - деді Мәулен Әшімбаев.