Маңғыстауда жаттықтырушы волейболшы қыздарды ұрған

Волейболшы қыздардың бетінен ұрған жаттықтырушының әрекеті әлеуметтік желіде қызу талқыға түсіп жатыр.

Жаңаөзен мектептерінің бірінде дене шынықтыру пәнінен сабақ беретін мұғалімнің оқиғаға қатысты түсініктемесін Lada.kz басылымы жариялаған болатын.

Волейбол жаттықтырушысы оқиғаға байланысты өз шындығын жариялады.

«Интернетте тараған видеоға қатысты айтарым, қыздар Жаңаөзен командасында ойнайтын волейболшылар. Жақсы көрсеткіш көрсетіп, спорт саласында айтарлықтай жетістікке жетіп жүр. Ол сырттан беттен ұру болып көрінген шығар, бірақ олай емес. Алтыншы нөмірдегі ойыншы - команда көшбасшысы. Мен оны жігерлендіріп, команданы белсенді болуға шақырғым келді. Менің әрекетім сырттан ойыншыларға деген қатігез қарым-қатынас ретінде көрінгені үшін кешірім сұраймын», - деді жаттықтырушы.

Естеріңзге сала кетсек, бұған дейін аталған жайтқа қатысты Маңғыстау облысы дене шынықтыру және спорт басқармасы да пікір білдірген болатын.

Ведомство бұл жайт Мұнайлы ауданында 14-15 желтоқсан аралығында коронавирус жағдайына байланысты көрермендердің қатысуынсыз өткен спорттық іс-шарада болғанын мәлімдеді.

Көп ұзамай видеодағы ер адамның Жаңаөзен қаласындағы № 3 орта мектептің дене шынықтыру пәнінің мұғалімі Азамат Тұрмағамбетов екені анықталды.

«Ол балалар мен жасөспірімдер спорт мектебінде жаттықтырушылар қатарында емес. Оны жарысқа ешбір ұйым жіберген жоқ, ол жеке тұлға ретінде қатысты», - деп түсінік берген болатын басқарма.

Аталмыш ведомство тексеріс жүргізетін комиссия құрылғанын, Азамат Тұрмағамбетовке қатысты шара қолданылатынын айтты.