Маңғыстауда жүк көтергіш машинаны 8 жасар бала басқарған

Облыстық полиция департаментінің баспасөз қызметі видео өткен жылдың қазан айында түсірілгенін хабарлады. Факт бойынша кәмелетке толмаған баланың ата-анасына қатысты әкімшілік хаттама жасалды.

26 қаңтарда видео желіде тарай бастады. Одан кәмелетке толмаған баланың трактор айдап бара жатқанын көруге болады.

«Осы факт бойынша Жаңаөзен қаласының патрульдік полициясының қызметкерлері «Әкімшілік құқық бұзушылық туралы» Кодекстің 612-бабының 5-бөлігіне сәйкес кәмелетке толмаған баланың ата-анасына хаттама толтырды. Сондай-ақ, кәмелетке толмағандардың істері жөніндегі уәкілдер 127-бап (кәмелетке толмағанның тәрбиесі және білім беру, құқықтары мен мүдделерін қорғау жөніндегі міндеттерді орындамау) және 128-бап (кәмелетке толмаған баланы әкімшілік құқық бұзушылық жасауға тарту) бойынша хаттамалар жасады»,-  деп хабарлады облыстық полиция.

Іс материалдары Жаңаөзен қаласы әкімдігінің жанындағы кәмелетке толмағандардың құқықтарын қорғау бөліміне берілді.