Маңғыстаудағы желден екі «ГАЗель» көлігі аударылып кетті

Маңғыстаудағы жойқын жел салдарынан жол үстінде келе жатқан екі «Газель» көлігі аударылып кетті. Оқиғадан зардап шеккендер жоқ. Полиция қызметкерлері қажеттілік болмаса көлік басқармауға кеңес берді.

Лада жергілікті басылымының ақпаратына сәйкес, Шетпе-Сай-Өтес тас жолының бойында екі көлік аударылып кеткен.

Оқиға кеше 8 желтоқсан күні орын алған. Тас жолда екі көліктің аударылып кеткені туралы ақпарат полиция бөлімшесіне 23:10 кезінде түскен.

«Оқиға орнына полиция патрульдері барды. Зардап шеккендер жоқ. Аударылған көліктерді трактормен көтеруге көмек көрсетілді» делінген облыстық полиция хабарламасында.

Құқық қорғау органдары жүргізушілерді қажеттілік болмаса рөлге отырмауға шақырады. Аймақта екінші күн қатарынан шаңды дауыл мен қатты жел болып жатыр.