Маңғыстауда көлік полицейлері балаларды өрттен аман алып қалды

Маңғыстау ауылында 11 ақпан күні түс ауа екі қабатты тұрғын үй өртенді. Өрт  вокзал маңындағы үйдің екінші қабатындағы пәтерден шыққан.

Қара түтін кіреберісті тез басып, тұрғындар, оның ішінде балалар да өз беттерімен шыға алмай қалды, деп хабарлады Көліктегі полиция басқармасының баспасөз қызметі.

Өртті полиция бөлімі дер кезінде байқаған. Алты полиция қызметкері полиция бөлімінің өрт сөндіру құралдары көмегімен адамдарды тез арада эвакуациялап, өртті сөндіруге кірісті. Бір пәтердегі тұрғындарды эвакуациялау кезінде полицейлер ересектердің қарауынсыз  қалған үш баланы тапты. Кішісін қолына көтерген полиция лейтенанты Қайыпбергенов оларды көшеге алып шықты.

Өрт сөндіру қызметі келгенге дейін тәртіп сақшылары (А.Умарбаев., Н.Қуанов., Н.Қайыпбергенов., Р.Хамит., А.Көктаубаев., Б.Орынхан) барлық тұрғындарды эвакуациялап, зардап шеккендерді және полиция қызметкерлерін аман алып қалды. Жалынның  өршіп, басқа пәтерлерге ұшқындауына  жол бермеді.

Өз кезегінде Көліктегі полиция басқармасының басшылығы жоғарыда аталған қызметкерлерді азаматтарды құтқару кезінде көрсеткен батылдығы үшін мадақтайтын болады.