Маңғыстауда блогер репост жасағаны үшін сотталды

17 ақпанда Ақтауда жала жапты деп блогер Айгүл Ақбердіге қатысты сот отырысы өтті, деп хабарлады «Әділ сөз» сөз бостандығын қорғаудың халықаралық қоры. Оған 180 АЕК (525 060 теңге) айыппұл салынды.

Өтініш беруші - Маңғыстау облысы Бейнеу полиция бөлімінің полковнигі Бөкен Жұмағали.

«Бұл полицияның бастамасымен азаматтық қоғам белсенділеріне қатысты жала жабу айыптары бойынша үшінші сот ісі. Бұған 2021 жылдың 5 қаңтарында Маңғыстау облысы Бейнеу полиция бөлімінің полковнигі Бөкен Жұмағали қудалағаны туралы хабарламаның қайта жариялануы себеп болды. Бұл хабарламаны Шолпан Өтекеева, Айгүл Ақберді, Ұлболсын Турдиева репост жасады», - делінген хабарламада.

Жаңаөзен аудандық соты Шолпан Өтекееваны 20 тәулікке қамауға алу туралы үкім шығарды. Экстремизммен күрес бөлімінің бастығы Бекбол Қорғанбаевтың мәлімдемесіне сәйкес, Мұнайлы аудандық соты Ұлболсын Турдиеваны 180 АЕК - 525 060 теңге айыппұл төлеуге үкім шығарды.