Маңғыстау тұрғындары кенелердің көбейгенін айтып шағымданды

Маңғыстау облысында малға кене жабысып, шаруаларды әбігерге салған. Түйе мен жылқы жәндіктердің шаққанынан қырылып жатыр. Фермерлер бұған себеп құрғақшылық деп санайды. Облыстың ветеринарлық басқармасы да өз нұсқасын айтты.

Бұл туралы Orda.kz Ладаға сілтеме жасап хабарлайды.

Фермер Бердіхан Әленов кененің шағуынан бес түйенің өлгенін растады.

– Биыл Маңғыстауда қатты құрғақшылық болып, кене көбейіп кетті. Олар негізінен арық түйелер мен жылқыларды шағады, өйткені мұндай мал оларға төтеп бере алмайды. Біздің Боржақты ауылында қазірдің өзінде 20-ға жуық шаруа қожалығы зардап шекті, - дейді фермер.

Маңғыстау облысы ветеринарлық басқармасының эпизоотиялық қауіпсіздік бөлімінің бас маманы Әділет Қазтұрған мұның себебі малдың биыл жайылымға бармағанымен байланысты екенін жеткізді.

– Шынында, кенелер көбінесе құмды жерде өмір сүреді. Бірақ биыл жануарлар жыл бойы қорада болды. Қораны түгел тазалап, көңді, шөп қалдықтарын шығарғаннан кейін ғана механикалық тазалау жүргізу керек. Содан кейін дезинфекция жасауға болады. Ал жануарларға әр түрлі паразиттерге қарсы екпе салу керек, - деді маман.

Ол жергілікті бюджетте паразиттерді жоюға қаражат қарастырылмағанын, сондықтан фермерлер бұл мәселемен өз бетінше күресу керектігін айтты.