Маңғыстау облысының денсаулық сақтау басқармасы басшылығына қатысты тергеу жүргізіледі

Сыбайлас жемқорлыққа қарсы қызмет Маңғыстау облысы денсаулық сақтау басқармасы басшыларының бірін қамауға алу фактісін растады.

Бұған дейін Telegram каналы мен Official kz-те 2020 жылдың мамыр айында бөлім бастығы болып тағайындалған Жамал Жаманбаеваның ұсталғаны туралы ақпараттар пайда болған еді.

Сыбайлас жемқорлыққа қарсы іс-қимыл агенттігінің ерекше маңызды істер жөніндегі тергеушісі Данияр Биғайдаров «облыста сотқа дейінгі тергеу басталды» деп мәлімдеді.

«Маңғыстау облысы бойынша сыбайлас жемқорлыққа қарсы қызмет Маңғыстау облысы денсаулық сақтау басқармасының басшылығына коронавирустық инфекцияның таралуын болдырмау үшін бөлінген қаражат шегінде медициналық техниканы сатып алу кезінде қызметтік өкілеттігін теріс пайдалану фактісі бойынша сотқа дейінгі тергеу жүргізуде», - деді Данияр Биғайдаров онлайн брифингте.

Тергеу мүддесі үшін күдіктінің аты-жөні айтылмады.