Маңғыстау облысында үкіметтік комиссия жұмысын бастады

Қазір облысқа Президент Қасым-Жомарт Тоқаевтың тапсырмасы бойынша Премьер-Министрдің бастамасымен құрылған Үкіметтік комиссия келіп, жұмысын бастады.

«Премьер-министрдің орынбасары Ералы Тоғжановтың төрағалығымен кеңес өтіп жатыр. Оған Президент Әкімшілігінің, Энергетика министрлігінің, Бәсекелестікті қорғау және дамыту агенттігінің, жергілікті атқарушы органдардың, «Қазмұнайгаз» ҰК» АҚ және басқа да мүдделі тұлғалардың өкілдері қатысты. Комиссия барлық тараптарды қанағаттандыратын өзара қолайлы шешім қабылдау үшін өзекті мәселелерді жан-жақты және жүйелі түрде қарастыратын болады» деді ҚР премьер-министрінің баспасөз қызметі.

Еске салсақ, 2 қаңтарда Батыс Қазақстанды газ бағасының қымбаттауына наразылық толқыны шарпыды. Жаңаөзендегі кішігірім ереуіл облыс сыртындағы жаппай наразылық шеруіне ұласты. Маңғыстаулық көлік иелеріне Алматы, Нұр-Сұлтан, Орал, Ақтөбе және басқа да қалалардың тұрғындары қолдау көрсете бастады. Шерулер әлі де жалғасып жатыр.